Слонім запрашае гасцей на Дзень беларускага пісьменства
Штогод у першую нядзелю верасня наша краіна адзначае Дзень беларускага пісьменства. Першай сталіцай свята ў 1994 годзе быў старажытны Полацк, потым гасцей з усяго свету сустракалі Тураў, Навагрудак, Нясвіж, Орша, Пінск, Заслаўе, Мсціслаў, Мір, Камянец, Паставы, Шклоў, Барысаў, Смаргонь, Хойнікі, Ганцавічы, Глыбокае, Быхаў і іншыя старажытныя культурныя цэнтры Беларусі.
Летась у Іванава Брэсцкай вобласці на свята прыехала больш за 12 тысяч гасцей з 12 краін свету.
Сёлета свята пройдзе ў слаўным горадзе Слоніме. Ужо 31 жніўня пачне работу міжнародны круглы стол, які аб’яднае пісьменнікаў Беларусі і замежжа.
Цэнтральнымі падзеямі свята будуць урачыстае адкрыццё, уручэнне Нацыянальнай літаратурнай прэміі і закрыццё Дня беларускага пісьменства, а таксама 1 верасня адбудзецца ўрачыстае адкрыццё помніка легендарнаму дзяржаўнаму і ваеннаму дзеячу, аднаму са стваральнікаў Статутаў Вялікага Княства Літоўскага Льву Сапегу. Пазней на галоўнай пляцоўцы свята адбудзецца святочны канцэрт Саюза пісьменнікаў Беларусі «Край бацькоўскі, мой край родны». Гэта будзе творчая прэзентацыя кнігі «Мая Радзіма», створанай спецыяльна да Дня беларускай пісьменства.
Акрамя таго, у Палацы культуры Слоніма пройдзе фотавыстава Уладзіміра Цыдзіка «Бачу Беларусь такой», якая ўжо пабывала ў 25 краінах свету. Адкрыецца і экспазіцыя, прысвечаная 25-годдзю беларускай дзяржаўнасці, – «25 кніг праекта „У пошуках страчанага“». Госці свята змогуць пабачыць старажытныя паштоўкі, прысвечаныя Слоніму, Мінску, Гродна. Пляцоўка кнігі і прэсы стане стартавай кропкай займальнага квэста «Код Сапегі». Удзельнікі пройдуць па дзесяці кропках – знакавых месцах Слоніма. Што гэта за месцы і чаму менавіта яны вылучаны, можна будзе даведацца непасрэдна падчас гульні.
Лейтматывам свята сёлета мусяць стаць некалькі тэм: Год малой радзімы, 75-годдзе вызвалення Беларусі ад нямецка-фашысцкіх захопнікаў, а таксама юбілеі класікаў беларускай літаратуры.
Больш падрабязна пра праграму ХХVI Дня беларускага пісьменства можна даведацца тут.
НІА
