Дзень Незалежнасці Рэспублікі Беларусь
Дата 3 ліпеня ўвайшла ў гісторыю Беларусі яркай старонкай гераічнай доблесці беларускага народа. У гэты дзень у 1944 годзе Мінск быў вызвалены ад нямецка-фашысцкіх захопнікаў.
Дзень Незалежнасці Рэспублікі Беларусь сёння – гэта, перш за ўсё, дзень памяці ўсіх тых, хто на палях бітваў і ў тыле цаной жыцця змагаўся за свабоду і незалежнасць нашай Радзімы. Тых, хто ў пасляваенны час ўздымаў нашу дзяржаву з руін, будаваў заводы і фабрыкі, дамы, дзіцячыя сады і школы.
У гонар іх памяці 3 лiпеня па ўсёй краіне праводзяцца масавыя ўрачыстасці і гулянні. Традыцыйна ў 10:00 у Мінску на праспекце Пераможцаў каля стэлы «Мінск – горад-герой» пачнецца ваенны парад. У гэтым годзе ўпершыню ў складзе парадных разлікаў пройдуць жанчыны-вайскоўцы, а таксама воіны Народна-вызваленчай арміі Кітая. У паветраным эшалоне будзе прымаць удзел не толькі беларуская авіяцыя, але і Паветрана-касмічныя сілы Расіі.
У праграме святочнага парада таксама запланавана тэатралізаванае шоу «Мой родны кут» з удзелам студэнтаў, артыстаў харэаграфічных і вакальных калектываў. У неба будзе выпушчана 1000 паветраных шароў, падымецца аэрастат у форме сэрца з надпісам «Мая Радзiма».
Увечары ў сталіцы адбудзецца гала-канцэрт «Беларусь – адзіная Радзіма». Госці свята ўбачаць шэсць міні-канцэртаў ад розных рэгіёнаў Беларусі. У іх прымуць удзел папулярныя артысты, творчыя калектывы.
Скончацца мерапрыемствы святочным салютам, які ў 23:00 расквеціць неба ў горадзе-героі Мінску, крэпасці-героі Брэсце, Віцебску, Гомелі, Гродне і Магілёве.
Са святам, паважаныя суайчыннікі! Міра, шчасця, здароўя, дабрабыту, новых поспехаў і здзяйсненняў на карысць моцнай і квітнеючай Беларусі!
НІА
